एकैसाथ चार सिनेमा

आगामी शुक्रबार एकैसाथ चार सिनेमा रिलिज हुँदै छन् । शंकर घिमिरे निर्देशित 'वीरताको चिनो', दयाराम दाहाल निर्देशित 'दशगजा', वासुदेव पोखरेल निर्देशित 'साहसी' र सुशिल पोखरेल निर्मित 'जयशिव शंकर' एकसाथ सार्वजनिक हुनेछन् । फर्मुला श्रेणीको चलचित्र 'वीरताको चिनो' देशब्यापी रिलिज हुनेछ । डीसीएनले वितरण गर्ने यो सिनेमा ३५ थिएटरमा प्रदर्शन हुनेछ । विराज भट्ट, ऋचा घिमिरे, सुमन सिँह, रेजिना उप्रेती स्टारर सिनेमाको निर्मात्री हिरोइन ऋचा हुन् । पति शंकरले निर्देशन गरेको सिनेमा डायस्पोरामा प्रीमियर भैसकेको छ ।


 राष्ट्रप्रेम, युवाको आकांक्षा र प्रेमको कथा मिश्रित सिनेमाभित्र एक्सन ड्रामा फेन्टासी सबै विशेषताहरु समेटिएको छ । सुशिल पोखरेल निर्मित एक्सनप्रधान सिनेमा 'जयशिव शंकर' मल्टिस्टारर सिनेमा हो । उपत्यकाबाट प्रदर्शनमा आउने सिनेमामा महानायक राजेश हमाल, विराज भट्ट, निखिल उप्रेती लगायत छन् । परम्परागत फर्मुला सूत्र प्रयोग गरिएको सिनेमा यसअघि विदेशमा पनि प्रदर्शित भैसकेको छ ।



दयाराम दाहाल निर्देशित 'दशगजा' सोसल ड्रामा श्रेणीको प्रोजेक्ट हो । नेपाल र भारतबीचको राजनीतिक, सांस्कृतिक, भौगोलिक असमानातलाई पर्दामा चित्रण गरिएको छ । दुईसाताअघि उपत्यकाबाट प्रदर्शनमा आएको 'दशगजा'ले डीसीएनको बक्सअफिसमा ४० लाख रुपैंया ग्रस बटुलेको छ । वासुदेव पोखरेल निर्देशित 'साहसी' शाष्त्रीय चिनियाँ युद्धकला ताइचीबारे छ । जहाँ अभिनेता हमाल नायक पात्रमा छन् र ताइची गुरुको भूमिकामा देखिन्छन् ।

 निर्माता समेत रहेका भोज गुरुङले पनि अभिनय गरेका छन् । वास्तविकरुपमा गुरुङ स्वयम ताइचीका प्रशिक्षक रहेपनि पर्दामा चाहिँ हमाललाई ताइची गुरुको रुपमा चित्रण गरिएको छ । एक्सन विशेषताको यो सिनेमालाई डीसीएनले वितरण गर्दैछ र उपत्यकाबाट रिलिज हुँदैछ ।  अभिनेता हमालले 'दशगजा', 'साहसी' र 'जयशिव शंकर'मा अभिनय गरेका छन् । संयोगवश तीनैवटा सिनेमा एकैसाथ रिलिज हुँदैछन् । हमालको एउटा फिल्मले अन्य दुई सिनेमासँग प्रतिस्पर्धा गर्नुपर्नेहुन्छ । 'जयशिव शंकर' र 'वीरताको चिनो'मा एक्सन नायक विराज भट्ट छन् । एकैसाथ एउटा अभिनेताको दुई वा सो भन्दा बढी सिनेमा रिलिज हुँदा यसको प्रत्यक्ष असर कलेक्सनमा पर्ने निश्चित छ । दर्शक बाँडिने समस्या त भयो नै अव्यवस्थित प्रदर्शनले निर्मातालाई कठिन पर्नेछ ।