प्रशान्त तामाङपछि अब आर्यन सिग्देल

एउटै स्टारको चलचित्र एकैदिन रिलिज हुने प्रवृत्तिले स्वदेशी सिनेमा ग्रसित हुन थालेजस्तो छ । राजेश हमाल, रेखा थापा, विराज भट्ट, प्रशान्त तामाङपछि अब पालो आर्यन सिग्देलको । आर्यन स्टारर सिनेमा 'के यो माया हो' र 'सपना' दुबैले साउन २० गते रिलिजको मिति तय गरेका छन् । 'गोर्खापल्टन'मा प्रशान्तले कमाएको साखलाई उनी अभिनित पछिल्ला दुई सिनेमा 'किन मायामा' र 'अँगालो यो मायाको'ले ह्रास तुल्याइदिएका दिए । प्रशान्त स्वयम यसबारे कुनै टिप्पणी गर्न चाहन्नन् । लभरव्वाइ आर्यन पछिल्लो समय यस्तै समस्याबाट गुज्रीएका छन् । आफूले अभिनय गरेका दुवै सिनेमा एउटै मितिमा रिलिज हुने भएपछि आर्यनलाई पब्लिसिटी र जुधाइको समस्या परेको छ । 

सकेसम्म फिल्मै जुधाउनु निर्माताका लागि राम्रो होइन । त्यसमा पनि एउटै कलाकारको फिल्मलाई आमने सामने तुल्याइदिँदा उक्त कलाकारको करियरको स्वभाविक चिन्ता पैदा हुन्छ । जसको प्रष्ट्याइँ प्रशान्त तामाङका दुई सिनेमा जुधाउँदा भयो । 'सकेसम्म नजुधाउने प्रयास गरिरहेका छौं' आर्यनले भने 'म चाहन्छु मैले नै खेलेका दुवै फिल्म नजुधुन् ।' निर्देशक सुदर्शन थापा पनि दुवै सिनेमालाई नजुधाउनेतर्फ पहल गरिरहेको बताउँछन् । ती दुवै सिनेमामा आर्यन लभरव्वाइको भूमिकामा छन् । सपनामा उनको एक्सन कला पनि देख्न पाइन्छ । फिल्म जुधाउँदा स्वदेशी सिनेमा र सम्बन्धित कलाकारका दर्शकहरु बाँडिने हुनाले कलेक्सनमा बाधा पुग्छ जसको असर निर्माताले खेप्नुपर्छ । यसका लागि उनी दौडधुपमै व्यस्त छन् किनभने एकवर्ष यता उनका कुनै पनि फिल्म रिलिज भएका छैनन् । यसैबीच आर्यनले आफू निशा अधिकारीसँग फिल्म नखेल्ने भनेर मिडियामा प्रसारित समाचारलाई आधारहिन भएको उल्लेख गरेका छन् । आफ्नो फेसबुक भित्तोमा आर्यनले अफवाहमा विश्वास नगर्न पनि भनेका छन् ।