श्रीमान् श्रीमती बनेर आउँदै श्रीकृष्ण र स्वेता

०६६ सालको सुपरहिट चलचित्र कहाँ भेटिएलाका जोडी श्रीकृष्ण श्रेष्ठ र स्वेता खड्कालाई दर्शकले बिभिन्न कार्यक्रममा एकसाथ देखे पनि पर्दामा भने दुई बर्ष बितिसक्दा पनि देख्न पाएका छैनन् ।

कहाँ भेटिएला पछि नायक श्रेष्ठ बिभिन्न कार्यक्रममा अतिथिको रूपमा सहभागी हुन र  आफ्नो चलचित्रलाई बिश्वका बिभिन्न मुलुकमा प्रदर्शन गर्न  नै व्यस्त देखिए । उनले करिब डेढ बर्षसम्म कुनै चलचित्रमा अभिनय गरेनन् । तर नायक श्रेष्ठकी जोडी अर्थात कहाँ भेटिएलाबाट डेब्यू  नायिका स्वेतालाई चलचित्र हाँसी देउ एक फेरमा नायक राजबल्लभ कोईरालासँग देखियो । तर दर्शकले सो चलचित्रलाई रूचाएनन् । चलचित्र नचलेपछि राज र स्वेताको जोडी पनि नचलेकै भन्दा गलत नहुन सक्छ ।

अब भने दर्शकले यो जोडीलाई छिट्टै नै पुन: पर्दामा एकसाथ देख्न पाउने भएका छन् । यि दुईले अभिनय गरेको चलचित्र 'श्रीमान् श्रीमती' प्रदर्शनको तयारीमा छ ।
मुनाल घिमिरेको निर्माणमा ऋषि लामिछानेले निर्देशन गरेको चलचित्र 'श्रीमान् श्रीमती' मा यो जोडीलाई श्रीमान् श्रीमतीको रूपमा देख्न सकिन्छ । हाल पोस्टप्रोड्क्सनमा रहेको सो चलचित्रमा श्रीकृष्ण र स्वेताको साथमा सरिता लामिछाने, मुकेश ढकाल, सुनिल थापा लगायतका कलाकारको अभिनय रहेको छ । रमाईलो प्रसङ यो छ कि, नायक श्रीकृष्ण श्रेष्ठ र नायिका स्वेता खड्कालाई रिल लाईफमा मात्र नभएर रियल लाईफमा पनि जोडीको रूपमा हेर्ने गरिएको छ । अधिकांश सञ्चारकर्मीहरूले यो जोडीलाई 'बिहे कहिले गर्ने ?' भन्ने प्रश्न गर्न छुटाएका हुँदैनन् । यो जोडीले बिहे गर्न सक्ने अड्कल पनि काटिएको छ । जे होस् रिल लाईफमा त यो जोडीलाई दर्शकले रूचाई सकेका छन् अब रियल लाईफमा श्रीकृष्ण र स्वेता जोडीको रूपमा प्रस्तुत भए भने पनि दर्शकले रूचाउने छन् भन्ने कुरामा दुई मत नहोला ।