'मायाज बार' चलचित्र बन्ने भो

झण्डै दुई बर्ष अघि गीतको काम सकेर पनि निर्माण हुन नसकेको चलचित्र 'मायाज बार' अब भने निर्माण हुने भएको छ । फरक कथावस्तु रहेको भनिएको यस चलचित्रलाई बितरक सुनिल मानन्धरले निर्माण गर्ने भनिएको थियो यद्यपि सो चलचित्र प्राविधिक कारण देखाउँदै निर्माण हुन सकेको थिएन । सञ्चारकर्मी दिनेश डीसीले निर्देशन गर्ने सो चलचित्रको पोष्टर समेत तयार पारिएको थियो । चलचित्र निर्माण हुने अन्तिम समयमा डीसीले आफू टेलिभिजन रेडियो र स्टेज कार्यक्रमहरुमा व्यस्त भएका कारण चलचित्रको निर्देशन गर्न समय निकाल्न नसकेका कारण चलचित्र रोकीएको निर्माण पक्षले जानकारी दिएको छ । केही समय अघि डिसीले आफु व्यस्त भएका कारण चलचित्रका लागी समय दिन नसकेको बताए पनि अहिले भने चलचित्र 'मायाज बार'का लागि समय निकाल्ने भएका छन् ।

बितरक सुनील मानन्धरले यसअघि नै चलचित्रको गीतहरुको काम भै सकेको र पोष्टर समेत तयार भएको भन्दै जुनसुकै हालतमा दिनेश डीसीकै निर्देशनमा सो चलचित्रको निर्माण गर्ने बताएका थिए । निर्माता, निर्देशक, कथा, गीतसंगीत सबै फाइनल भए पनि चलचित्रमा केही नयाँ कलाकारहरुले अभिनय गर्न सक्ने भन्दै कलाकार र अन्य प्राविधिकको नाम भने सार्वजनिक गर्न निर्देशक डीसीले चाहेनन् । यद्यपी उनले चलचित्रका लागि केही नयाँ कलाकारहरुको छनौट भने भइसकेको बताएका छन् । चलचित्रको छिट्टै नै छायाँकन थालिने निर्माण पक्षले जनाएको छ ।