कर्ण शाक्यले गरे पोस्टर बहिष्कार

कर्ण शाक्य आफैमा सकारात्मक चिन्तनका लेखक र निर्माता हुन् । उनका सामाजिक अभियानहरु सबैतिर प्रशंसित पनि छन् । तिनै कर्ण शाक्यले नेपाली सिनेमामा पहिलोपटक यस्तो एउटा नयाँ काम थालेका छन् जुन यसअघि गरिएको थिएन । आफू र गोपिकृष्ण मूभिज मिलेर निर्माण गरेको चलचित्र 'पल'को पब्लिसिटीलाई शाक्यले वातावरणमैत्री तुल्याउने भएका छन् । उनको यो कार्यलाई सबैले स्वागत गरेका छन् । 'पल'को प्रचारप्रसारमा पोस्टरको प्रयोग नगरिने भएको छ । टाँसेपछि उप्काउने चलन नभएकाले पोस्टरले सहरलाई फोहोर र असभ्य बनाएको बन्दै उनले पोस्टर बहिस्कार गरेका हुन् । 'प्रचार र व्यक्तिगत स्वार्थको लागि सहर फोहोर बनाउने चलन छ नेपाली सिनेमामा' पर्यटन व्यावसायी समेत रहेका शाक्यले मेरोसिनेमासँग भने 'आफैबाट नयाँ कामको थालनी गर्न लागेको हुँ । आशा गरौं सबैले मलाई सहयोग गर्नुहुनेछ ।' पर्खाल, भवन र भित्ताहरुमा जथाभावी सिनेमाका पोस्टर टाँसेर नउप्काइँदा फोहोर बढेको भन्दै चलचित्र क्षेत्रको आलोचना हुने गरेको छ ।



प्रकृति जोगाउने निर्माता कर्ण शाक्यको अभियानलाई सबैले पछ्याउनु जरुरी छ । रिलिजको डेट तय नगरिएपनि चाँडै सार्वजनिक हुने सिनेमाको निर्देशन रमेश बुढाथोकीले गरेका हुन् । एउटै पात्र र परिवेशलाई दुई भिन्न कथात्मक ढाँचामा प्रस्तुत गरिएको चलचित्रलाई कतिपयले संसारमै नौलो बताएका छन् । राजवल्लभ कोइराला, निशा अधिकारी, अनुप बराल, करिश्मा मानन्धर स्टारर सिनेमाको पर्यावरणमैत्री पव्लिसिटीबाट अन्य निर्माताले पनि सिक्नु जरुरी छ ।