'हाम्रो माया जुनी जुनीलाई' मौसमको चुनौती

खराब मौसमका कारण चलचित्र 'हाम्रो माया जुनी जुनीलाई' को छायाँकनमा बाधा आएको छ । समयमै छायाँकन कार्य नसकिंदा चलचित्रका निर्माता प्रदिप उदय निकै चिन्तित छन् । चैत्र ११ गतेबाट छायाँकन शुरू गरिएको सो चलचित्रको खराब मौसमका कारण अहिले सम्म पाँच दिन छायाँकन ब्रेक गर्नु परेको निर्माता उदय बताउँछन् ।

यसरी बेलाबेलामा छायाँकन ब्रेक गर्नु पर्दा चलचित्रको बजेट बढ्ने गरेकोले निर्माता उदय चिन्तित देखिएका हुन् । निर्माता उदय भन्छन्, 'शुरूमा बजेट निर्धारण गरेर छायाँकन शुरू गरिएको हुन्छ तर पछि कुनै न कुनै तरिकाले खर्च बढेकै हुन्छ ।' धेरै लगानी गर्दा पनि लगानी अनुसारको पैसा उठ्ने सम्भावना न्यून रहेकोले पनि आफू चिन्तित भएको उनको भनाई छ । यधपि उनी आफ्नो चलचित्र सफल हुनेमा ढुक्क छन् । उनी भन्छन्, 'कर्चखर्च बढे पनि मेकिङमा कुनै कन्जुस्याईं गरेको छैन । युनिट सबैको राम्रो साथ र सहयोग पाएको छु । त्यसैले चलचित्र राम्रो बन्ने कुरामा ढुक्क छु ।'

ऋषि लामिछानेले निर्देशन गरिरहेको सो चलचित्रको छायाँकन अन्तिम चरणमा पुगेको छ । पूर्ण रूपमा प्रेमकथामा आधारित रहेर निर्माण गरिएको सो चलचित्रमा श्रीकृष्ण श्रेष्ठ, रेखा थापा, मुकेश ढकाल, नीता ढुंगाना, सुनिल थापा, शिबहरी पौडेल, सरोज केसी, राजकुमार, सुशन खड्का र निर्मल शर्माको मुख्य अभिनय हेर्न सकिनेछ । काबिल फिल्मका लागि ब्रदर्श इन्टरटेन्मेन्टको प्रस्तुती रहने सो चलचित्रलाई नारायण कुमार पाण्डे 'काबिल', गंगा पौडेल र गोपाल पाण्डेले निर्माण गर्दैछन् ।

चलचित्रमा महेश खड्काको संगीत, गोबिन्द राईको नृत्य, रोशन श्रेष्ठको द्वन्द तथा संजय लामाको छायाँकन रहेको छ । अहिले चलचित्रको छायाँकन काठमाण्डौ वरपरका स्थानहरूमा भईरहेको छ ।